目標：麥徑6段金山郊野公園至第9段田夫仔落清快塘到深井食燒鵝(M116-M169)
預計時間：8:00a.m.-7:00p.m.共11小時
點知今次的目標路程及時間都出了很大的意外及問題，所以無燒鵝食，攪到PC好唔開心。
成員：TC、PC、KC（本來是齊人，但FC早上打來話黎唔到，因為前一晚食錯野攪到個肚唔舒服）
約了TC8:00a.m.在金山郊野公園石梨貝水塘巴士站等，但我同PC遲到，8:15a.m.才到達。
8:25a.m.正式起步，今日天氣及氣溫很好，行起黎都好舒服。9:15a.m.已經行完第6段到達城門水塘燒烤場，用左50分鐘，是最快的一次完成。
小休一陣就繼續起程，9:27a.m.到達上針山的路牌(M126)。10:11a.m.到達針山山頂。不需一小時上到頂，又是最快的一次。10:25a.m.落到針山腳，繼續朝向草山進發。11:10a.m.到達十周年回歸亭，小休一陣就繼續落鉛礦凹。11:33a.m.到達鉛礦凹，第7段用了2hr22min，又是最快的一次完成第7段。
休息一陣後繼續出發，向著全港最高的山大帽山進發。不需半小時就上完最難行的大石級上山路。行完一段風涼水冷舒服稍為平坦的山路後，開始落山朝向上大帽山前石屎路前的涼亭，但在落山的路段卻有一大班人與我們反方向上山。12:44p.m.到達石屎路前的涼亭，我們在此大休及吃什餐，我與PC又係食飯團。13:10p.m.向最高的山進發，13:35p.m.到達大帽山山頂。這次我又除鞋鬆一鬆，順使check下隻鞋有無用鞋墊(上次行到呢度山頂才發覺行左甘耐原來對鞋係無鞋墊)，呢次當然有啦。跟住就係落山，14:20p.m.就到達扶輪公園。第8段用左2hr47min，又係新紀錄。
連埋休息今次行6-8段只係用左6個鐘減5分鐘。上次同PC行都要8個鐘先行完，今次加埋TC，就快左兩個鐘，我地估係因為無左FC係度，FC成日都放頭行得好快，放乾左我同PC，今次無佢就行得順D。出左甘大既意外同問題，點算呢？若果去深井食，不需3個鐘，豈不是唔使5:30p.m.就到深井，咁早食燒鵝，好似唔係幾妥當。於是我提議唔去深井食燒鵝，行埋第10段去屯門，屯門都應該有燒鵝食。點知PC聽到無燒鵝食，重要行到去屯門，即刻無晒心機，之後的步速完全放慢晒。
14:40p.m.出發行第9段向田夫仔進發。一路都係石屎路加小小暗斜。我地步速放慢了，因為PC無晒心機。16:40p.m.到達吉慶橋毅行者Check Point 9，用左2個鐘，算係正常一般時間。我地係度大休，我食埋第2個飯團。
16:55p.m.再次出發，邁向終點M200屯門何福堂。17:20p.m.繞行大欖水塘時看見太陽伯伯落山，影番幅日落相先。18:05p.m.行完水塘路，上到引水道行石屎路。天已經黑了，要用電筒，避免跌左落引水道。19:02p.m.到達M193毅行者終點前落軍營的路口，已經有個帳幕預備好。行多500米就到終點，當然今日就要行到屯門才是我地既終點。行到呢個時候，已經很攰，步速越來越慢。終於係19:55p.m.到達M200麥徑第十段終點，要影番幅相先。第十段用了3個鐘，都係最快既時間。
總結：麥徑6-10段(M116-M200)共42公里用了11個半鐘完成，認真出乎意料之外，只因今日天氣溫度都好好，才做到這個時間。我地自己知自己事。
最後我地都無食到燒鵝，只係係屯門市中心既快餐店食晚餐。食完就快快地走人，好在唔使10點就返到屋企，可以大休嘞。
沒有留言:
張貼留言