今日本來跟網友行山，但因時間太早及要兩上吊燈籠，怕自己的體力及膝頭未能負荷，因此放棄。但又想在鎖羅盤封村前去一次，因此今日約了TY一起行，本來重有兩個年青人及昔日毅行隊友PC，但最終都係剩番我地兩個行。
12:10到達烏蛟騰起步，落車時還未落雨，怎知突然下大雨，要在停車處避一陣雨。很快因雨勢轉弱，我們就擔遮行。後來更停雨，直到行完全程都無再落雨。
烏蛟騰(12:15)--亞媽笏(12:55)--荔枝窩(1:30-2:00)--鎖羅盤(2:50)--榕樹凹(3:35)--亞公坳(3:55)--大環(4:35)--鳳坑(5:10)-鹿頸(5:30)
全程約13公里，用了5hr15min完成。
今日孭腰包行山，連行山杖都無帶，雙膝無痛，上落山都無問題，但似乎係雙腳及膝頭唔夠力，開頭上山都無問題，但當腳攰時上山就無力，行得好慢。今日著左對係毅成買既鞋Evolv，其實買左好耐，用黎行街，今次第一次用黎行山，因為呢對鞋係防跣的，毅成話有外國報告測試過重厲害過Five Ten，我就唔多信。今次天雨路滑就試下，在濕滑的石上真係唔跣，TY反而跣左幾次。我估呢對鞋的防跣都幾好。
烏蛟騰祠心村起步
過左祠心村之後這是上山的路口
遠望吉澳及印洲塘
去荔枝窩村之前先去通心樹要由風水林這路口入就正確，我地行過左先去左荔枝窩再繞路去通心樹，浪費左不少時間。
這是通心樹，我不敢捐入去，只係外面影相就算
白花魚藤，不准攀爬或坐。
進入陰深的鎖羅盤
下望所羅盤
TY正望著09年7月1日封村的告示，以後不能直過，可能要轉右上山路行。
鎖羅盤廢村
以前細個既時候公園玩既爬鋼架
遠望沙頭角及深圳
我地呢一段沿岸邊行，這是蠔
有很多人正在掘蠔
去到大環松記買番罐可樂救命
中間是一個島名叫水浸咀排，若水漲會淹過沙堤，今日水退，可以行過去。
鳳坑村
到達終點鹿頸，剛看見小巴開走，要等半個鐘
我地就在此食豆腐花及等車
沒有留言:
張貼留言