農曆年假最後一日，平時星期六甚少有機會行山，今次難得太太與仔仔肯同我一齊行，當然揀Ｄ容易Ｄ既山路，太太話最好1至2個鐘就夠，但我希望她可以去一Ｄ靚景的地方，於是揀左由西灣經咸田到赤徑，3-4個鐘必定行得完，又可以有靚景睇。
今日中午吃完少少東西後，就搭車到西貢，轉搭的士入西灣亭，的士費83元。1:25西灣亭起步，今日天色很好，藍色天空，有陽光但不太熱又不太凍，行山最舒服。沿路望見萬宜水庫很靚的景色，仔仔常常一馬當先行前頭，太太與我則慢慢行，欣賞風景，沿路都有不少人行山。2:10到達西灣，就去去開的黎伯開的士多，當然一家人每人吃番碗豆腐花及腿旦麵。大休一輪後，2:50再次起行，經過西灣沙灘，沙實在很幼，踏落去好像踏落Ｄ綿花度，又望見D浪一層一層打埋沙灘，很靚。經過西灣沙灘後就是上山路，以前是溪澗出口，要跨過少許水流才能上山，否則要經麥徑正路行好入才有橋，但今次行就溪澗的水已被沙完全掩蓋，不需踏水過就可以上山。經過60多米高的山腰後就落山見到咸田灣，遠望蚺蛇尖、東灣山及長咀。落到咸田灣，經過獨木橋，這條橋比以前的短了很多，又是因為條小河被沙掩蓋了很多，只剩很窄的河，連小朋友都可以踏水而過，今日就有幾個外國小朋友係度玩水及踏水過河，不需行橋。3:50到達咸田的士多，休息一會，這裡今日都很多人。4:00再次起程，因太太右腳行得耐就會痛，因次這段石屎上山路往大浪坳就慢慢行，4:50到達大浪坳，我地上一上蚺蛇尖的上山路入口，稍為高一點就望到很開揚的景觀，又影番幾幅相。於是再次起程落山，向赤徑進發。落山路仔仔再次一馬當先，影都唔見就落左去，太太與我就慢慢行，免得膝頭受力過多。5:10到達赤徑碼頭，本來預左要搭大飛，怎知問左往黃石碼頭要150元最低消費，認真貴，以前都係100元，由黃竹角咀鬼手去黃石碼頭都係300元最低消費，赤徑這麼近都要150元，都無諗住搭就見到街渡船就到，原來開5:20，15元一位，真係堅番好多。否則寧願繼續慢慢行上去北潭坳都唔使45分鐘。終於上船可以休息完成今日的旅程，5:30到達黃石碼頭，睇住94號巴士已經開出，諗住要等半個鐘，好在15分鐘後5:45就有車，因有少許塞車，6:30到達西貢，一家三口去吃海鮮，仔仔要食海膽，就是上次與Ricky及TY去那間吃。
今日真開心，因為甚少機會一家三口一起行山，我與太太或我與仔仔就有機會一起行，但三個人一起行真係很少機會，這是假期最後一天可以一家人享受大自然，真是感恩。
西灣亭起步
很靚很清的萬宜水庫
落西灣山的路，遠遠望見西灣
在西灣黎伯的士多吃豆腐花及腿旦麵
很靚的西灣沙灘，一層層的浪打埋岸邊
西灣的靚靚幼沙，及藍色天空
另一個角度看西灣沙灘
落咸田灣，遠望大灣及東灣，可望見蚺蛇尖及東灣山及長咀
咸田灣
咸田的木橋變成這麼短
蚺蛇尖，遠望有很多人仍然上上落落
仔仔一馬當先走去赤徑碼頭看看有無船
沒有留言:
張貼留言