100701雙鹿石澗-四叠潭至千絲瀑

2010年7月1日公假   天晴炎熱 氣溫33度

今日與六位年青人去行雙鹿石澗，有MK2、TY、Andrew、Ricky、嫡嫡、Carol。本來舊年已想去雙鹿石澗，但未有機會，到今日先至成行，但因遲出發、玩水玩太耐及天氣實在太熱，所以最終都未能全溯雙鹿石澗，只行了一半，過咗千絲瀑至鹿湖遊郊徑交滙處就走人。

10:00西貢麥記集合，10:45搭29R村巴，11:10到達西灣亭，11:45到達西灣沙灘，先到黎伯的士多吃午餐，黎伯一見到我就話好耐無見，重主動同我握手；我就先吃碗凍豆腐花，跟住吃腿旦麵及飲可樂。12:40起行，經過西灣沙灘，實在太熱，見到有好多遊艇，重見到有對新人在沙灘拍婚沙照。1:20到達四叠潭。我們在此玩水，這裡已經有好多人，但比預計少了很多，平時假日這裡都是人山人海。這裡有很多人都高台跳水，約有8、9米高，水深都有3、4米。重有外國人帶埋BB黎玩水。

玩完水後，3:05先至起行，其實我已經唔係好想行，因為實在太熱，而且時間太晏未能全溯。但無理由就咁返轉頭，因此決定行到去千絲瀑接鹿湖郊遊徑走人。我們沿左邊水管路向千絲瀑進發。4:30到達千絲瀑，我們在此影完大合照後，就沿左邊攀上千絲瀑。因太熱及很耐無行山，我爬完上千絲瀑後已覺很攰，要休息休息。5:05到達水壩，休息一會。5:20起程,沿壩的左邊山路上，再行一段山路及石澗，5:50到達鹿湖郊遊徑交滙處。我們在此離澗，沿鹿湖郊遊徑返回西灣亭，6:15到達西灣亭，等了一陣就有村巴返回西貢巿中心。完成今日炎熱的旅程。