100404麒麟山

2010年4月8日     大雨至微雨     溫度18-20度

一早已約了Ricky及TY今日行山，原來對上一次與他們二人行山已是去年12月的事。所以今日雖然天文台話有雨及間中有狂風雷暴，我們都照樣出發。在粉嶺集合後，看見雨勢越落越大，又未有巴士黎，差點想打退堂鼓，但又不想掃興，決定照搭巴士去起點，但行程縮短。原本行程：麒麟村起步往麒麟山、小羅天、大羅天、雞公嶺、逢吉鄉。現改為只上麒麟山。

11:10到達麒麟村，與入口的毛澤東打招呼後開始找入口上山。雖然落雨，但我們都著多咗條防水褲及防水風褸，只有Ricky差不多全程擔遮，可能係有型D呢！山路雖然濕，但也很易行，一個鐘12:10就上到麒麟山頂，只有222米高。跟著就落山，1:15到達麒麟山坳，諗住行大路往河上鄉，怎知過了粉嶺公路後，地圖上往河上鄉的路實際上係無，係行唔到，攪咗好耐3:00先去到河上鄉，諗住可以去荳品廠$8任食的豆腐花及荳漿，怎知去到門口，寫住內部裝修，無得食！問人之後知道，因它只是荳品製造廠，無飲食牌照，但因為太出名，所以被查牌，未有牌照無得賣。我們見到綠色小巴，立刻跳上車往上水吃下午茶。完成今次雨中閒遊的旅程。